تــــاج

جالي من وفــاء

نخش في الموضوع على طول

1 -- بدأت تدون من امتي ؟ و دخلت العالم ده ازاي ؟

والله بدأت أدون تقريبا من يوم 8 ابريل سنة2007 للميلاد ، يعني بقالي حوالي سنة واربع شهور و27 يوم وكام ساعة
ودخلت العالم ده ... اممممم والله مش فاكر الصراحة سمعت كام مرة عن كذا مدونة مشهورة وكده دخلت حبيت أعرف ايه النظام لقيت الموضوع شدني بس قمت قررت انشاء المدونة دي ... بس كده

........................................

2-- ايه كان انطباعك في البداية ؟

انطباعي بالنسبة للمدونة بتاعتي كان عادي مفيش حاجة مميزة ليه ... كان مجرد مكان لنشر بعض الآراء والأعمال ليس إلا ... كنت عايز أقيم مستوايا بشكل ما فقلت ان المدونة هتدي فرصة لده ... طبعا في الأول ما كانش فيه تعليقات ... لكني كنت فرحان بالمدونة لأنها .... اممم معرفش بحبها وخلاص

........................................

3-- مين اكتر واحد بتهتم بتعليقه علي بوستك الجديد ؟

سؤال محوري لا يخلو من الخبث ... الصراحة كل من دخل إلى صفحتي المتواضعة وترك تعليقا فأنا اشكره على رفع روحي المعنوية وعلى انتقاده لي أيضا لأن ذلك دائما يضيف

........................................

4-- ايه أهم حاجة اتعلمتها من عالم التدوين ؟

أهم حاجة اتعلمتها ... أهم حاجة أهم حاجة ... امممم ... أقولك أهم حاجة اتعلمتها ان الواحد ما يستهنش بأي حاجة يكتبها أو برأيه لأن ساعات بنشوف مش حلوة لكنها بتكون مقبولة

.......................................

5-- ايه أكتر حاجة كرهتها ؟

أكتر حاجة كرهتها ... فيه ناس بتحب تستظرف على الفاضي يعني يدخل يسيبلك كومنت يشلك لما تقراه وهو مش بينقد ولا حاجة هو بس بيتريق مثلا او بيتراخم ... ودي حصلت معايا مرة واحدة ومسحت الكومنت تطبيقا للديمقراطية وحرية الرأي

.......................................

6-- حاسس ان التدوين له تأثير ؟

اه طبعا له تأثير كبير جدا بدليل وجود عدد من المدونات المشهورة والمعروفة مصريا وعربيا وعالميا كمان اللي بتعبر عن الرأي العام أو بتطرح مواضيع تهم فئات من الناس زي الرياضة أو الدين أو الفن الخ
وبدليل ظهور سلسلة مدونات مصرية للجيب وقيام دار الشروق باختيار بعض المدونات لافرادها في كتب زي مدونة "عايزة أتجوز" مثلا

.........................................

7-- تهدى التاج لمين ؟

أهدي التاج إلى

*كراكيب

*كلام وخلاص

*dina

*نهر الحب

*عمرو وجيه

*آلاء

*لولا

والسـ ختام ــلام